GUAYISMO

Guayismo borroka moldeari ateak ixten: Hirritarren segurtasunerako lege proiektua

Cubako erregimena… zenbat eta zenbat preso politiko ditu Castro diktadoreak bere kartzelatan, ezberdin pentsatzeagatik. Venezuela, Chavezen diktadurari jarraipena eman dio Madurok, oligarkiaren eraso ekonomiko neoliberalak ekiditeko botere gorenak ezarri baitizkio bere buruari. Ipar Koreako dinastiako diktadura, nire aitonak hasi, aitak jarraitu eta nik neuk, Kim Jong-un jaunak jarraitzen duena, herrialdearen ateak ixteagatik eta herria militarizatuta izateagatik deitzen naute diktadore. Eta nola ez itxi herrialdeko ateak, herria nola ez da egongo prest hainbeste esfortzu eskatu duen independentzia nazional eta soziala lortzea defendatzeko?

Oligarkiarentzat hauexek dira diktadurak, baina azaleko azterketa kritiko bat eginda, ikus dezagun “eskubide estatuko” espainiar estatu “demokratikoa”: Kapitalismoaren kontraesanak ageriago ikusten diren honetan, oligarkiak, bere interesak mantentzeko beharrezkoa ikusten du eraso zuzenera pasatzea, herriaren alienaziorako balio zuen ongizate estatua ere ez dute behar jada herria asimilatua izateko, eta horregatik langileak itotzen ari dira, lehiakortasun indibiduala areagotu eta lanposturik kutreena “opari” bezala saldu nahi digute. Erasoaldi berri honen aurrean, noski, langileak are asimilatua egoteko lege diktatorial bezala ulertu behar dugu hiritarren segurtasunerako lege proiektua.

Herriaren biolentzia gelditu nahi dute, herriak eta euskal herri langileak bereziki, nazio eta klase zapalkuntzaren aurka egindako borroka gaitzetsi eta kondenatzea eskatzen digute, eta iraultzaile deitzen diren asko gure herriak egindako erresistentzia borroka historikoa gaitzetsi egin du, horrek suposatzen duenarekin: herri langileak erresistentziarako duen eskubidea ukatzea. Estatuak ez du inoiz kondenatu ezta kondenatuko ere berak eragindako biolentzia, euren egoera soziala biolentziaren bidez lortu duelako eta egungo estatuaren estrukturak biolentziaren eta sarraskiaren bidez eraiki dira: Ameriketako konkista eta sarraskia (kapitalismoak beharrezkoa zuen kapital metaketa eragin zuena), Nafarroako konkista, 1936ko faxisten altxamendua… 3 data xume dira, baina egungo zapalkuntza egoerara ailegatzeko beharrezkoak izango direnak. Estatuak ez du gertakari horien biolentzia inoiz kondenatuko (Arrazaren eguna, Nafarroako anexioa…), horrela balitz estatuaren zilegitasun eta burgesiaren egoera soziala arriskuan jarriko lituzkeelako. Egoera hori mantentzeko beraz, kalea kontrolatu behar du, Espainiako biztanleak zapalkuntza nabaritzen hasi diren honetan, euskal herriaren erresistentzia ulertzera ere ailegatu daitezkeelako, eta estatuak aspaldi egindako erasoaldirik okerrena ari gara jasotzen, poliziak herria kontrolatzeko.

Lege berri honekin, orain lortu nahi dutena da, Espainiaren sinbolo diren bandera eta ereserkia ez iraintzea (30.000€ko isuna), kongresuaren aurrean protestarik ez deitu ezta egitea ere (30.000€), polizia iraindu edo grabatzea (1.000€), instituzio publikoen aurrean protestak egitea, eskratxeak egitea, aurpegia estalita edukitzea, poliziaren erasoen aurrean barrikadak egitea… Hau dena hiru kategoriatan sailkatu dute: delitu arinak (1.000€ arteko zigorrak), delitu larriak (30.000€ arte) eta delitu oso larriak (600.000€ arte). Honen sailkapena, euren estatusa arriskuan jartzen den nibelaren arabera jarrita dago noski, eta estatuaren denok eman behar dugu zerbait… birmoldatuaren lemapean, krisitik aterako gaituztela esaten digute bitartean.

Guk lema bera erabili behar dugu, baina etsaia zein den argi irudikatuz, eta asimilatuago nahi gaituzten momentu hauetan, aktiboago egon behar gara, intsumisioa eta desobedientzia kontzeptu abstraktoak praktikara eramanaz, kaleak gure bihurtuz, biolentoari, borreroari bere sendagai berarekin erantzunez, gehiago garelako, eta beraiek ez daukaten arma boteretsu bat dugulako: MAITASUNA! Eta maitasunak antitesi bat dauka, horrekin erantzun behar diogu etsaiari, gorrotoarekin, Mikel Laboa handiak ongi esaten zuen, orain modan jarri den abesti batean: …bakarka ezin da, fusilak ala kateak…