KAFEA TA ZIGARROA

Zapatak lotu ditut, giltzak, dirua, non dago metxeroa? Etxeko ataria zeharkatu eta hirurehun metro eginen ditut kafe ebakia hartzeko. Egia esan, goizeko bost zigarroen ostean seigarrena gustura erretzeko soilik eskatuko dut kafea. Beste espaloian institutu garaiko klasekide bat. Nola aldatzen diren gauzak, kamarada; Zure azken hamar urtetako gora-beherak badakizkit eta ez dut zure ahotik horren berririk jaso. Beste honek eta besteak kontatu didate zertan eman duzun denbora; Bartzelonako bizitza, diru arazoak eta nola irten zaren zulo horretatik. Badakizu nolakoa zen... baten batek lagunduko zuen. Institutuko militantzia, itxura baino ez zen izan berea, honek ere hemengo dena alboratu eta beste hiri batera egin zuen ihes, koldar osti hori! Errepidea zeharkatzea burutik ere ez zait pasa. Eskua apur bat altxa, ez gehiegi, eta kitto.

Moztu berria duten belardian txakur kaka bat. Hau ere ez zuten jasoko ez! Eskerrak nirearenak txikiak diren eta ez diren igartzen.

Zigarroa piztu dut, tabernara heldu orduko beste bat nahiko dut eta berdin da jada. Zigarro bat gehio gaurkoz. Zeinen zaila uztea eta zeinen erraza beste bat piztea. Lana aurkitzea zailegi, droga erosterik edonon. Gordeta dudan diru apur hori ez dut aurrezterik izanen, gramo baten xahutu ezkero berdin, beraz. Bai. Asteburu hontan taupadak azkartuko ditut! Noizbehinka ez dago gaizki... esaten zuen batek. Biziko al da elementu hau? Hori bai zuela bizioak harrapatu! Astetartez ere jaten zuen horrek. Eskerrak ez garen holakoak, norbaiten urteak ez badira behintzat, ondo goaz.

Kotxe bat musika ozen eta azkarregi. Joder, karneta atera berria izango du horrek. Gurasoek ordainduta ziur. Portzierto, ia aitari igerilekuko kuota nire kontura pasatzea esaten diodan. Urteak nire atzetik matraka horrekin eta ez da nekatzen gizona!

Tabernaren kalean sartu, bankuan lagun bat. Honek bai bizi ederra! Amaren herentzia hori kobratu zuenetik ez du kolpe zorrik jo. Denok nahiko genuke holako laguntza bat jaso, ze preziotan baina? Uf. Zein ondo bizi den egunero entzun beharra ordea, astuna da gero! Besteon bizitzen iritziak botatzeko baino ez du denborarik honek. Gaizki ala okerrago ari garen, gauzak nola egin behar diren... diosss, guk ez genion ezer esan ba bere aitari laguntza eman ordez zulora bultzatu zuen hortan, kabroia! Ziur naiz beste era batean eramanen nuela nik asuntoa. Bere aita zer moduz dagoen galdetu beharko diot noizbait.

-         Zesatek motel?

-         Ba, betikoa. Kafea ta zigarroa.

-         Bai, ni ere.

-         Ta bestela, ondo?

-         Gaizki ez behintzat.

-         Ederki ba. Barrura niek.

Ertxolegi